So  Manches  is  ganz  anerscht  Heit.

Oftmols  denk  ich  mer, liewe  Leit;

So  Manches  is  doch  ganz  anerscht  heit.

Un  so  Manches  was  Frieher  e  Witz  wor  geween;

Des  is  in  der  heidichi  Zeit  Worheit  genn.

 

Wann  mer  so  e  modernes  Bild  heit  g`sieht;

Vor  des  hätt  ich, in  der  Schul, e  Vierer  kriet.

Der  heidichi  Kinschtler  awer, hat  gut  abkassiert;

Er  hat  jo  schließlich  och  Johrelang  studiert.

 

Wann  mer, im  Fernseh, die  Mode  heit  g`sieht;

Dann  kenn  ich  niemand  wu  so  ettwas  onzieht.

Trotzdem  sin  Die  wu  des  mache  beriehmt  in  de  Welt;

Un  die was  des  zeige  krien  och  e  dicki  Stang  Geld.

 

Haustiere  sin  heit  so  e  Oort  Kinnerersatz;

Ich  red  jetz  do  vu`m  Hund  un  vun  de  Katz.

Sie  werre  geboot, frisiert, sogor  Kleider  misse  se  krien;

E  Katz  hat  e  Maus  hehschtens  im  Fernseh  mol  g`siehn.

 

Die  Jugend  hat  Ringe  in  de  Nos, un  an  sunscht  manche  Stelle;

Mir  han  des  bei  de  Schwein  gemach, das  se  net  wuhle  selle.

Die  neie  Hosse  han  heit  schun  iwerol  Risse;

Frieher  hat  mer  sowas  glei  nähe  misse.

 

Na  ja, das  sich  och  viel  zum  Gudi  hin  verennert  hat  is  gewiß;

Doch  ich  menn  das  viel  dervunn  och  e  große  Bledsinn  is.

Un  wer  weß, vielleicht  in  Hunnert  Johr;

Hat  de  Mensch  sei  Verstand  schun  ganz  verlor! 

Helmuth  Ganzer

but1.gif (1867 Byte)weiter

zurückblink.gif (2510 Byte)